［匯豐禁買CoinBase股票］同時間Bitcoin價又大跌

經濟原文：滙豐H...

［匯豐禁買CoinBase股票］同時間Bitcoin價又大跌

經濟原文：滙豐HSBC據報擬禁止客戶購買Coinbase股票 （https://bityl.co/6Qai）

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

1. 預咗啦，如果公司Policy 係唔畀你買賣任何加密幣相關嘅公司，既然之前話MicroStrategy（MSTR） 都買唔到，咁Coinbase唔畀買好合理。

2. 不過呢，CoinBase都超過600億美金市值（實數視乎你點量度，舊文解過），即係幾大？講緊都打入標普500指數頭100位咁滯。同66億市值嘅MicroStrategy比又爭好遠了。而既然CoinBase一路都賺錢（好好賺添），似乎真係有機入標普指數？

3. 但依然都係奇怪，MSTR本身真係唔係「加密貨幣」公司。只係拎啲錢走去買。咁玩法如果Tesla 同 Square（SQ）甚至美圖（1357）又點計？

4. 固然都係嗰句，商業決定，絶對合法，亦都唔見得極之奇怪。亦講真，買呢啲股嘅人都未必幫襯匯豐。但點解有生意唔做呢？驚監管當局遲早搞？明顯同咩俄鋁之類唔同，呢啲係匯豐自己決定，唔係監管機構壓落嚟（否則就間間銀行都唔畀你買啦）

5. 我個人反而係覺得，傳統銀行唔多唔少都怕加密貨幣威脅，可能背後發功篤背脊。你見有啲政府（土耳其，印度）都或多或少阻止加密貨幣。咁如果銀行自己一路又做呢啲生意，篤人背脊就說不過去了

6. 之但係，又唔見其他銀行禁買喎，講到尾都係有啲奇怪。

7. 但講真，就算全部銀行一齊唔畀你買呢啲股票，真係冇乜影響。都唔使話極端到覺得所有股市所有銀行都係呃人嘅嗰啲友，就當你買股票，你大可以幫襯IB富途之類啫。

8. 我甚至感覺而家銀行都唔多想做散戶嘅證券生意。有啲雞肋。我朋友（真係我朋友）想買股票，去匯豐，銀行都幾乎係「婉拒」佢，連個開戶哥仔都話佢知貴，強烈叫佢幫襯第間之類，好似銀行哥仔話「我地自己都唔會用」（我唔知exact wordings，都話係我朋友，唔係我）

9. 所以講到尾都係似表態多。另外，聽聞（亦係我朋友，唔係我，我就係朋友比較多）啲加密貨幣交易所賺到嘅錢，轉去匯控，都會有問題的。

10. 不過另一方面，剛剛問朋友（第三個朋友！我就係朋友多），佢個匯豐戶口，仲落到盤喎。（本人冇匯豐戶口，所以要問朋友）

11. 又睇下事態點發展。

12. 然後，剛寫完文，就見到比特幣價忽然大插14%，6萬插到5萬。原因？唔知喎，話有傳聞話美國財政部告幾間金融公司用加密貨幣洗黑錢喎。不過冇主流source，流嘅成份都幾高。但冇所謂，信者恒信，唔信嘅繼續唔信。不過你問我，唔信先要買。

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

---